Ақтаулық өрт сөндірушілер «Қазақтеңізкөлікфлоты» ҰТКҚК» ЖШС ғимаратында дайындықтарын пысықтады

Ақтауда «Қазақтеңізкөлікфлоты» ұлттық теңіз-кеме қатынасы компаниясы (ҰТКҚК)» ЖШС әкімшілік ғимаратында өрт-тактикалық жаттығуы өтті.

Жаттығу «аңызы» бойынша, 17 сағат 00 минутта әкімшілік ғимаратының кеңсе аумағында жануға ұласқан электрсымдарының қысқаша тұйықталуы орын алды.

Өрт бір бағытта дами бастады және тікбұрышты форма түзілді. Өрттің таралу жылдамдығы минутына 0,5 метрді құрады, жану қалың түтін мен улы газдардың бөлінуіне әкеп соқты.

«Қазақтеңізкөлікфлоты» әкімшілік ғимараты 2015 жылдың 4 мамырында қолданысқа тапсырылды. Өртке қарсы қорғау жүйесі өрт сөндіру құралдарын қолданумен, өрт сөндіру суқұбырлары желілерімен, автоматты түрде өртті сөндіру, өрт туралы хабарлау арқылы, өрттің таралуын шектеуді және тез арада адамдарды қауіпсіз жерге көшіруді қамтамасыз ететін құрылыс шараларын  қамтыды.  Нысан екі технологиялық бөлімдерден құралған: нысанның қоғамдық бөлігі – кеңселер мен көлік тұрақтары.

Шартты «өртке» үшінші, жоғары қүрделі деңгей тағайындалды. Ғимараттағы «тілсіз жаумен» күреске 18 техника бірлігі, Маңғыстау өрт сөндіру – құтқару гарнизонының жеке құрамынан 50-ге жуық сарбаз, сонымен қатар  апат медицинасы орталығының қызметкерлері келді.

Бұл туралы біздің басылымға «Маңғыстау облысы ТЖ департаменті Өрт сөндіру және авариялық-құтқару жұмыстары қызметінің» мемлекеттік тіл және ақпарат тобы хабарлады.