Қарақия кәсіптік колледжі көкөніс өсіруде гидропоника әдісін қолданады

Қарақия кәсіптік колледжі өсімдіктер мен көкөністерді топырақсыз суда өсіру тәсілін бастады, деп хабарлайды Қоғамдық коммуникация орталығы білім басқармасының баспасөз қызметіне сілтеме жасап.

Республика бойынша гидропоника техникасын қолданып отырған өндіріс ошақтары мен оқу орындары санаулы. Соның бірі Құрық ауылында орналасқан Қарақия кәсіптік колледжі.

Облыс бойынша да алғашқы гидропоника өсіру тәсілі Қарақия кәсіптік колледжінде ашылды. Ол үшін арнайы кабинет жабдықталды. Арнайы пән оқытушылары мен өндірістік оқу шеберлері Тараз қаласынан тағылымдамадан өтті.

Сонымен қатар «Жеміс-көкөніс шаруашылығы» мамандығының 3-курс студенттерімен бірлесе отырып, тәжірибе жүзінде жұмыстарын бастады. Гидропоника әдісі өте тиімді. Бір қалыпты климатта, минералдарға бай өнімді алуға болады.

Бүгінгі күні қияр, шпинат, құлпынай, аскөк, ақжелкен көкөністері өсірілуде және қажетті құралдармен қамтамасыз етілген.

Алғашқы өнімді алу биыл маусым айына жоспарланып отыр дейді колледж мамандары.