Форт-Шевченко қаласында 260 орындық өнер мектебінің құрылысы басталды

Түпқараған ауданының орталығы Форт-Шевченко қаласында өнер мектебінің құрылысы басталды, деп хабарлайды Қоғамдық коммуникация орталығы аудан әкімдігінің баспасөз қызметіне сілтеме жасап.

Аталған ғимарат NCOC компаниясының демеушілігі негізінде салынуда. Бұл туралы Түпқараған аудандық құрылыс бөлімінің басшысы Нұртай Мұхан мәлімдеді.

Нұртай Мұханның айтуынша салынып жатқан өнер мектебінің жалпы ауданы 1,6 га. Пайдалануға берілген соң бірнеше мамандарды жұмыспен қамтуы тиіс ғимарат 400 орындық көрермен залынан тұрады.

Аталған өнер мектебінде көрермен залынан бөлек, өзге де қосымша үйірмелер жұмыс істеп, жас балалар мен тұрғындарды өнер мен мәдениетке баулымақ.

- Форт-Шевченко қаласында өнер мектебінің құрылысын салу көптен бері көтеріліп келе жатқан өзекті мәселелердің бірі. Бүгінде NCOC компаниясының демеушілігімен салынып басталып жатыр. Мердігер мекеме қазіргі уақытқа арнайы техникаларын алып келіп, орналастыруда. Ғимарат екі қабаттан тұрады. Одан бөлек биыл аудан орталығында өнімділігі тәулігіне 5000 кубтық теңіз суын тұщыту зауытының құрылысы басталады және Сайын Шапағатов ауылдық округіне 160 орындық спорт кешенінің жобалық сметалық құжаттамасы дайындалып, мемлекеттік сараптамаға берілді, - деді Нұртай Мұхан. ​

Айта кетейік, құрылыс жұмыстары кезеңінде де бірнеше тұрғын жұмыспен қамтылатын болады.