МӘМС аясында үш коронарлық тамыры зақымданған науқасқа күрделі операция жасалды

Маңғыстау облыстық көпбейінді ауруханасында 51 жастағы Орал қаласының тұрғынына міндетті әлеуметтік медициналық сақтандыру (МӘМС) есебінен тегін аортокоронарлық шунттау операциясы жасалды. Жүректің үш коронарлық тамырының зақымдануына байланысты жүргізілген операция сәтті өтіп, қазіргі уақытта науқастың жағдайы жақсы.

Науқасқа жүректің ишемиялық ауруы, үш коронарлық тамырдың зақымдануы бойынша хирургиялық ем жүргізілді.

Жүректің ишемиялық ауруы — жүрек бұлшықетіне қан мен оттегінің жеткіліксіз түсуінен туындайтын дерт. Көбіне ауру коронарлық артериялардың атеросклероз салдарынан тарылуымен байланысты дамиды. Қан айналымының бұзылуы кеуде тұсының ауыруына, ентігуге, тез шаршауға әкеліп, кей жағдайда миокард инфарктісінің қаупін арттыруы мүмкін.

Үш коронарлық тамырдың зақымдануы жүректің қанмен қамтамасыз етілуіне елеулі әсер етеді. Мұндай жағдайда науқастың жағдайы мен тексеру нәтижелеріне қарай аортокоронарлық шунттау операциясы тағайындалуы мүмкін.

Аортокоронарлық шунттау — жүрек бұлшықетіне қан жеткізетін тарылған немесе бітелген тамырларды айналып өтетін қосымша жол қалыптастыруға бағытталған күрделі хирургиялық әдіс. Операция барысында науқастың өз қан тамырының бір бөлігі пайдаланылады. Нәтижесінде жүрек бұлшықетінің қанмен қамтамасыз етілуін жақсартуға және ауру белгілерін азайтуға мүмкіндік туады.

«Аортокоронарлық шунттау — жүректің ишемиялық ауруын емдеуде қолданылатын маңызды хирургиялық әдістердің бірі. Әсіресе бірнеше коронарлық тамыр зақымданған жағдайда операция қажеттілігі әр науқасқа жеке бағаланады. Емнің негізгі мақсаты — жүрек бұлшықетінің қанмен қамтамасыз етілуін жақсарту және жүрек-қан тамырлары асқынуларының қаупін төмендету», — деді Маңғыстау облыстық көпбейінді ауруханасының дәрігер-кардиохирургі Асылбек Анетов.

Операциядан кейін науқастың жағдайын бақылау, дәрігер ұсынымдарын орындау, дәрілік емді сақтау және кардиологиялық оңалтудан өту маңызды. Сонымен қатар қан қысымы мен холестерин деңгейін бақылау, дұрыс тамақтану және салауатты өмір салтын ұстану жүрек саулығын сақтауға ықпал етеді.

Айта кетейік, міндетті әлеуметтік медициналық сақтандыру (МӘМС) жүйесі азаматтарға медициналық көрсетілімдерге сәйкес жоғары технологиялық медициналық көмек алуға мүмкіндік береді. Аортокоронарлық шунттау операциясы тиісті көрсетілімдер болған жағдайда МӘМС аясында көрсетіледі. Бұл пациенттердің күрделі кардиохирургиялық емге қол жеткізуіне жағдай жасайды.

Ақпаратты:

МӘМС жүйесіндегі мәртебе туралы:

МӘМС бойынша аударымдар мен жарналарды төлеу, сондай-ақ медициналық көмектің сапасына қатысты мәселелер бойынша:

Әлеуметтік медициналық сақтандыру қорының Маңғыстау облысы бойынша филиалы

Ресми сайт – https://msqory.kz/ru/

Youtube-канал – https://www.youtube.com/@msqory_kz

Telegram-канал – https://t.me/medsaqtandyru

Facebook – https://www.facebook.com/msqory/

https://www.facebook.com/msqory.mangistau/  

Instagram – https://www.instagram.com/msqory_kz/

https://www.instagram.com/msqory_mng/