Ақтөбелік ұландық жағажай самбосынан әлем чемпионатының қола жүлдегері атанды

2026 жылғы 12–13 қыркүйек күндері Бразилия Федеративтік Республикасының Сан-Паулу штатындағы Карагуататуба қаласында әлемнің үздік спортшылары қатысқан жағажай самбосынан әлем чемпионаты өтуде.

Жағажай самбосынан әлем чемпионаты Бразилияда алғаш рет ұйымдастырылып отыр. Жарыс аясында ерлер мен әйелдер арасында сегіз салмақ дәрежесі бойынша жеке белдесулер, сондай-ақ аралас форматтағы командалық сайыстар өткізілуде.

Қазақстан Республикасының құрама командасы сапында аталған әлем чемпионатына Ақтөбе қаласындағы Қазақстан Республикасы Ұлттық ұланының 6655 әскери бөлімінің әскери қызметшісі, қатардағы жауынгер Азат Қуанов қатысты.

88 келіге дейінгі салмақ дәрежесінде өнер көрсеткен Азат Қуанов жарыс қорытындысы бойынша үшінші орынға ие болып, жағажай самбосынан әлем чемпионатының қола жүлдегері атанды.
Аталған салмақ дәрежесінде бірінші орынды Ресей Федерациясының өкілі Антон Суровцев, екінші орынды Румыния спортшысы Георге Бодырлау иеленді. Үшінші орын үшін жүлдені Молдова өкілі Максим Юхневич пен Қазақстан Ұлттық ұланының әскери қызметшісі Азат Қуанов бөлісті.

Жаһандық додада қол жеткізген жүлде әскери қызметшінің жоғары деңгейдегі спорттық дайындығы мен шеберлігінің нәтижесі болып табылады. Сонымен қатар, Азат Қуановтың жетістігі Қазақстанды және Ұлттық ұланды халықаралық спорт аренасында лайықты танытуға қосылған үлес болды.

ҚР ҰҰ «Батыс» өңірлік қолбасшылығының баспасөз қызметі