ЭҚЖЖ-дағы өзгерістер: 2026 жылғы 1 шілдеден бастап салық төлеушілерге не білу керек

Бейнеу ауданы бойынша Мемлекеттік кірістер басқармасының басшысы Нұрбаев Еркінбек Аманқұлұлымен сұхбат

— Еркінбек Аманқұлұлы, 1 шілдеден бастап Экономикалық қызмет түрлерінің жалпы жіктеуішінің (ЭҚЖЖ) жаңа редакциясы күшіне енді. Қысқаша айтып беріңізші, не өзгерді және бұл неліктен маңызды?

Нұрбаев Е.А.: Иә, 2026 жылғы 1 шілдеден бастап ЭҚЖЖ-тың жаңартылған редакциясы қолданысқа енді. Ол халықаралық жіктеуге сәйкес келтірілді. Өзгерістер қазіргі заманғы қызмет түрлерін, жаңа кәсіптер мен бизнес бағыттарын дәлірек көрсетуге бағытталған. Кейбір кодтар нақтыланып, егжей-тегжейлі болды, ескіргендері алынып тасталды, жаңалары қосылды. Ең көзге түсетін өзгерістер бөлшек саудаға (соның ішінде нысанның ауданына байланысты), туристік қызметке, курьерлік қызметтің жекелеген түрлеріне, сондай-ақ газ сатуға және робототехника өндірісіне қатысты болды.

— Жұмыс істеп тұрған жеке кәсіпкерлер мен жауапкершілігі шектеулі серіктестіктер үшін жаңа кодтарға көшу қалай жүріп жатыр?

Нұрбаев Е.А.: Салық төлеушілердің басым көпшілігі үшін көшу автоматты түрде — ескі кодтарды жаңаларымен салыстыру арқылы орындалды. Алайда қателерді толық жоққа шығаруға болмайды. Кейбір қызмет түрлеріне жаңа кодтар берілді немесе олар неғұрлым детальды бөліктерге бөлінді. Сондықтан біз барлық ЖК мен ЖШС-ке көшуден кейін қандай ЭҚЖЖ коды берілгенін өз бетінше тексеруді және қажет болған жағдайда мәліметтерді жаңартуды ұсынамыз.

— Егер код дұрыс өзгермесе не істеу керек? Мысалы, Бейнеу ауданының тұрғындары қайда жүгінуі керек?

Нұрбаев Е.А.: Ең алдымен салық төлеушінің жеке кабинетінде немесе электрондық қызметтер сервистері арқылы ақпаратты тексеру қажет. Сәйкессіздік анықталған жағдайда Бейнеу ауданы бойынша Мемлекеттік кірістер басқармасына жүгінуге болады. Біз кеңес беруге және өзгерістерді дұрыс енгізуге көмектесуге дайынбыз. Есептілікті тапсыру, рұқсат құжаттарын алу немесе мемлекеттік сатып алуларға қатысу кезінде мүмкін болатын қиындықтарды болдырмау үшін мұны уақтылы жасаған жөн.

— Кәсіпкерлерге қандай кеңес бересіз?

Нұрбаев Е.А.: ЭҚЖЖ кодтарын тексеруді кейінге қалдырмаңыздар. Бұл формальдылық емес, дұрыс салықтық және статистикалық есептің маңызды элементі. Уақтылы жаңарту қателерді болдырмауға және бизнесті тыныш жүргізуге көмектеседі. Біздің мамандар әрқашан байланыста және көмектесуге дайын.

ЭҚЖЖ тізімі