Жаңаөзен білім бөлімі кәсіпкерлерге негізсіз талаптар қойған

Маңғыстау облысы бойынша Сыбайлас жемқорлыққа қарсы қызмет білім саласына мониторинг жүргізу барысында Жаңаөзен қаласының білім бөлімі 5 жекеменшік балабақшаға террористік тұрғыдан осал объектілерді қорғау ережелерін сақтауды қамтамасыз ету туралы негізсіз талап жібергенін анықтады.

«Терроризмге қарсы іс-қимыл туралы» Заңға және қағидаларына сәйкес аталған білім беру ұйымдары террористік тұрғыдан осал объектілердің қатарына жатпайтыны белгілі болды. Осыған қарамастан, білім бөлімі жеке балабақшаларға террористік тұрғыдан осал объектілерді қорғау ережелерін сақтауды қамтамасыз ету туралы талап қойған және кәсіпкерлердің бұл талаптарды орындамаған жағдайда мемлекеттік білім беру тапсырысын ала алмай қалу ықтималдығы жоғарылаған. 

Департамент осы мәселе бойынша ұсынымдар енгізді. Сәйкесінше, білім бөлімінің талабы тоқтатылды.