Батыр ауылында жолдарға асфальт төсеу жұмыстары жүргізілуде

Мұнайлы ауданына қарасты Батыр ауылдық округінде «Ауыл - ел бесігі» мемлекеттік бағдарламасы аясында ауылішілік жолдарға асфальт төсеу жұмыстары жүргізілуде, деп хабарлайды Қоғамдық коммуникация орталығы.

Үш жоба аясында Батыр ауылдық округінің 8 көшесіне жөндеу жұмыстары жүргізілетін болады.

Атап айтқанда Емір шағынауданының бірінші көшесі мен Шерқала, Самал, Тамшалы шағынаудандарының он екінші көшелеріне және Емір, Шерқала шағынаудандарының қиылысқан көшесіне, Самал, Шерқала шағынаудандарының қиылысқан көшелеріне, Самал, Тамшалы шағынаудандарының қиылысқан көшелеріне, Хазар, Астана, Алматы, Болашақ шағынаудандарының жетінші көшелеріне барлығы 15 шақырым жолға орташа жөндеу жұмыстары кезең-кезеңімен жүргізілетін болады.

-Тұрғындардың өтініштері негізінде 2022 жылы бірнеше көшені асфальттау бойынша жоба жасалды. Биыл қаржыландыру көздеріне қарай сол жобалар іске аса бастауда. Негізгі басымдық бұрын салынған асфальт жолдарды бір-бірімен байланыстыру, әлеуметтік нысандарға апаратын жолдар мен қоғамдық көліктер қатынайтын жолдарды салу болатын. Жол құрылысы жұмыстарына ауылдың жұмыссыз тұрғындары жұмылдырылатын болады, - дейді ауыл әкімінің міндетін атқарушы Гүлшеру Джайылғанова.

Қазіргі таңда жолды тегістеу, күреу, қалпына келтіру жұмыстары жасалуда.