Маңғыстауда 1-сыныпқа құжаттарды қабылдау басталды

Маңғыстауда 1-сыныпқа құжаттар 1 сәуір мен 1 тамыз аралығында қабылданады. Бұл туралы Қоғамдық коммуникация орталығында өткен брифингте облыстық білім басқармасының бөлім басшысы Клара Құлатаева хабарлады.

Спикердің айтуынша, жаңа оқу жылында 21 мыңға жуық оқушы мектепке барады деп жоспарланған. Баланы 1-сыныпқа қабылдау үшін өтінішті халыққа қызмет көрсету орталығында және мектептерде орналасқан өзін-өзі қызмет көрсету бұрыштары арқылы беруге болады. -2022 жылы 20 108 бала 1-сыныпқа қабылданды. Сол уақытта ата-аналардың 80 пайызы онлайн-өтініш берген болатын.

-Биыл да egov.kz порталы арқылы тиісті құжаттарды жолдау қызметі қолжетімді. Ол үшін алдын-ала білім беру ұйымын белгілеп, тізімге сәйкес талап етілген құжаттарды тіркеу керек. Атап айтар болсақ, баланың туу туралы куәлігінің көшірмесі, 026/у-3 нысаны бойынша денсаулық паспорты, 063/у нысаны бойынша денсаулық жағдайы туралы құжат және 3х4 форматындағы фотосуреттің екі данасы қажет, - деді Клара Құлатаева.