Маңғыстауда 2023 жылы 120 жаңа автобус пайдалануға беріледі

Бұл туралы Қоғамдық коммуникация орталығында өткен брифингте Маңғыстау облыстық жолаушылар көлігі және автомобиль жолдары басқармасының басшысы Адайбек Қалиев мәлімдеді.

Спикердің айтуынша, жаңа автобустар Ақтауға, аудандарға, оның ішінде «Ақтау-Мұнайлы» бағытына қатынайтын қоғамдық көліктерге беріледі.
Атап айтқанда, Ақтау қалалық №1, №3, №4, №5, №6, №7, №8, №9 маршруттарда 70 автобус, ауданаралық №107, «Ақтау-Батыр 2-Ақтау» бағытындағы маршруттарда 20 автобус жаңартылады. 

Сонымен қатар, қалаарлық «Ақтау-Жетібай», «Ақтау-Құрық», «Ақтау-Таушық» бағытына 10 автобус қолданысқа беріледі деп жоспарлануда. Мұнайлы ауданішілік №13А «Маңғыстау-Қызылтөбе-Маңғыстау»,  «Маңғыстау-Батыр-Маңғыстау», «Маңғыстау-Баянды-Маңғыстау» бағытында 20 жаңа автобус қатынайтын болады.  

-Ал, Ақтау қалалық және ауданаралық №107 маршрутынан босайтын 48 дизелді автобустар, Бейнеу ауданішілік, Жаңаөзен қалалық және ауданаралық бағыттарына бөлінеді,-деді Адайбек Қалиев. 

Нақтылағанда Бейнеу ауданішілік №2, №3, №4, №5, №7 бағыттарына 20 – «Ankai» маркалы автобустар, Жаңаөзен қалалық №3, №5, №9, №11, №12  маршруттарына 18 – «Yutong» маркалы автобустар берілсе, ауданаралық «Ақтау-Ақшұқыр»,  «Ақтау – С. Шапағатов» бағдарларына 10 «Ankai» автобустары халыққа қызмет көрсетеді. 

-Жобаны қаржыландыру үшін жергілікті бюджеттен автобустардың жалпы құнының 20% мөлшерінде аванстық төлем жасалатын болады,- деді Адайбек Қалиев.