Маңғыстауда антикор 1,6 млрд теңге мемлекеттік қаражатты үнемдеді

«Сатып алулардың біріңғай терезесі» порталына жүргізілген мониторинг нәтижесінде 1,6 млрд. теңге бюджет қаражаты үнемделді. Бұл туралы Маңғыстау облысы бойынша Сыбайлас жемқорлыққа қарсы қызметтің басқарма басшысы Қайрат Байгебаев мәлімдеді.

«Мемлекеттік органдар мен мекемелердің, квазимемлекеттік сектор субъектілерінің сатып алатын тауар немесе қызметтерінің бағаларына мониторинг мемлекеттік сатып алудың жоспарлау сатысында және нарықтық көрсеткіштермен салыстыру арқылы жүргізіледі. Бақылау жұмыстары «Атамекен» Ұлттық кәсіпкерлік палатасының «Сатып алудың бірыңғай терезесі» жүйесі мен Мемлекеттік сатып алу порталы арқылы ұйымдастырылады. Жыл басынан бері тиімсіз сатып алулардың алдын алып, 1,6 млрд. бюджет қаражатын үнемдедік,» деді Қайрат Байгебаев.

Сондай-ақ, спикер өз сөзінде өңірде комплаенс қызметі жолға қойылғанын атап өтті.

«Маңғыстау облысының квазимемлекеттік сектор субъектілерінде адалдық стандарттарының сақталуына бақылау жасайтын комплаенс институты енгізілген. Сыбайлас жемқорлыққа қарсы комплаенс-қызметтердің негізгі миссиясы – ұйымның және оның қызметкерлерінің сыбайлас жемқорлыққа қарсы іс-қимыл туралы заңнамасын сақтауды қамтамасыз ету,» деді Қайрат Байгебаев.

Сонымен қатар, Жаңаөзен аймағы бойынша құқықбұзушылықтарға шұғыл әрекет ету үшін Сыбайлас жемқорлыққа қарсы қызметтің бөлімі құрылғанын хабарлай отырып, сыбайлас жемқорлық белгілері бар қылмыстық, әкімшілік құқықбұзушылық деректері бойынша жазбаша өтініш беруге немесе Агенттіктің 1424 номеріне хабарласуға болатындығын атап өтті.