Маңғыстауда сыбайлас жемқорлық тәуекелдерінің картасы негізінде мониторинг жүргізіледі

Сыбайлас жемқорлыққа қарсы іс-қимыл агенттігі әрбір өңір үшін сыбайлас жемқорлық тәуекелдерінің картасын әзірледі.

Бұл картада процестердің ашық болмауына, әкімшілік кедергілердің болуына, шенеуніктердің асықпауына немесе озбырлығына, заңнаманың жетілдірілмеуіне байланысты шешімін таппайтын көкейкесті мәселелердің тізбесі көрсетілген.

Атап айтатын болсақ, Маңғыстау облысы бойынша медицина, жол және инфрақұрылым, жер, олигополия, экология салалары сыбайлас жемқорлық тәуекелдері картасына енгізілген. Әрі қарай, осы салалардағы мәселелерді заңсыз шешу мүмкіндіктерінің алдын алу мақсатында жүйелі жұмыстар жүргізіледі.  

Агенттік Төрағасы Олжас Бектенов бұл тәуекелдер картасы нақты өңірдегі аумақтық органдардың жұмысы үшін бағдар болуы тиіс екенін айтып өтті.

Осы тұста, Маңғыстау облысы бойынша Сыбайлас жемқорлыққа қарсы қызмет департаменті аталған салалар бойынша сыбайлас жемқорлық тәуекелдер мен проблемалық мәселелерді анықтау және оны шешу жолдарын ұсыну үшін жоспар негізінде жұмысты бастады.

Атап айтатын болсақ, алдымен өңірдегі газ бағасы мен оны бөлу, тасымалдау кезіндегі делдалдар, «ҚазГПЗ» ЖШС 90% ескіруіне байланысты тоқтап қалу қауіпі, «ММГ», «ӨМГ», «ҚМГ», «Ақтау-Құрық» порты сияқты ірі мекемелерге жұмысқа орналасудағы жемқорлық, квазимемлекеттік сектордағы мемлекеттік сатып алудың ашықтығына қатысты мониторинг жұмыстары жүргізіледі.