Маңғыстау облысында 2022 жылы 7 мектеп салынады

Бұл туралы Қоғамдық коммуникация орталығында өткен брифингіде Маңғыстау облысы құрылыс, сәулет және қала құрылысы басқармасы басшысының міндетін атқарушы Айнұр Манкешова мәлім етті.

«Бүгінде ең өзекті мәселе – аймақтағы білім беру нысанының санын көбейту. Жалпы 2022 жылы өңірде 7 мектеп салынады деп жоспарланған. Қазір 5 мектептің құрылысы басталды. Оның 3-уі Ақтау қаласының жаңа шағын ауданында орналасса,  2-уі Мұнайлы ауданында салынып жатыр. Тағы 2 мектептің құрылысын салуға конкурс жарияланды. Оның бірі - Маңғыстау ауданы Бекі ауылындағы 100 орындық орта мектеп болса, тағы бірі - Ақтау қаласының 34 шағынауданында орналасқан 900 орындық мектепке жапсаржай құрылысын салу жобасы», - деді Айнұр Манкешова.

 Спикердің айтуынша, бұдан бөлек жыл соңына дейін 3 мектеп пайдалануға беріледі.

 «Биыл қолданысқа берілетін білім беру нысандарына тоқталсақ. Ақтау қаласының 32А шағын ауданындағы №29 орта мектептің 300 орынға арналған жапсаржай құрылысы, Бейнеу ауданы Бейнеу ауылындағы Күйкен орта мектебі жанындағы оқу корпусы және Ақтау қаласы Өмірзақ ауылындағы №27 мектептің жапсаржайын қайта құру жобасы. Бұл жұмыстар жақын арада аяқталады», - деді Айнұр Манкешова.