Маңғыстаулықтарға арналған Жаңа жылдық жарқын тілектер

Сыныптай сырғыған жүйрік уақыт зымырап өтіп, тағы бір жылды артқа қалдырғалы отырмыз. 2019 жыл бойы біздің басылым өз оқырманын түрлі саладағы жағымды жаңалықтарымен қуантуға тырысты.

Өңірдегі төтенше жағдайлардың алдын алу, тұрғын үй секторындағы өрт оқиғаларын болдырмау бағытындағы тиісті қызмет өкілдерімен атқарылған қыруар жұмыстардың легі туралы хабардар етумен қатар, маңғыстаулық спортшылардың, әсіресе самбошылар мен дзюдошылардың және оларды дүбірлі додаларға дайындап, баптаған бапкерлер қауымының ел  абыройын асқақтатқан ерен жеңістері туралы паш еттік.

Ақтау қаласының ең кіщкентай тұрғындарының халықаралық үлкен сайыстарда өнер көрсетудегі қол жеткізген жеңістері жайлы көпшілікке қуана жариялап, «Жастар жылындағы» аймақ жастарының бағындырған биіктері мен жеткен жетістіктері де назарымыздан тыс қалмады.

Маңғыстаулық кәсіпкерлер қауымының бизнестегі табыстары туралы біраз қуанышты жаңалықтардың да куәсі болдыңыздар. Сан саладағы жағымды жаңалықтардың жаршысы болуға тырысқан «Тумба» газеті мен «tumba. kz» сайтының бір жыл бойына көтерген мәселелерінің баршасы туралы қысқаша айтып жеткізудің өзі қиын.

Адам баласы Жаңа Жылдан көп жақсылық күтеді, Жаңа Жылға көп үміт артады. Барша адамзат бұл күні өткенді ой елегінен өткізіп, саралап, Жаңа Жылға таза ниетпен, болашаққа деген мол сеніммен, нық қадаммен аттағанды қалайды. 

Өткен жылды қорытындылай келе,  Жаңа 2020 жылға зор сеніммен аяқ басып, барша маңғыстаулықтарға арналған ақжарма тілектерге орын берейік, құрметті оқырмандар!

Жаңа - 2020 жыл құтты болсын!!!

Видео Нұркен Тәжібай