96 жастағы ардагер «ЭКСПО» көрмесіне барады

96 жастағы ақтаулық ардагер Қайыр Қыдырбаев Астанада өтіп жатқан «ЭКСПО» халықаралық көрмесіне баруды жоспарлап отыр. Ұлы Отан соғысының ардагері елімізде алғаш рет өтіп жатқан маңызды шарадан шет қалмауды ұйғарыпты. Ол Елордада 3 күндей болып, жасыл энергия саласындағы тың жобалармен танысып шықпақ. Әрі қарай 14 күн Бурабайда демалады.

Қарияның бұл сапарына облыс әкімдігі мен жергілікті кәсіпкер Бауыржан Білман қолдау көрсетпек.

Қайыр атай қан майданға 21 жасында аттанған. Мерген жігіт бірнеше елдің қалаларын азат ету ұрыстарына қатысып, Берлинге дейін жетеді. Саналы ғұмырын ауыл шаруашылығы, мұнай тасымалы саласына арнапты. Бүгінде 18 немере мен 35 шөберенің ортасында бақытты күн кешіп отыр. 96 жастағы қарияның денсаулығы әлі тың. Осы жасына дейін басы ауырып, балтыры сыздамапты. Себебі, салауатты өмір салтын ұстанады, кешкі 5-тен кейін тамақ ішпейді екен.

ҚАЙЫР ҚЫДЫРБАЕВ, ҰЛЫ ОТАН СОҒЫСЫНЫҢ АРДАГЕРІ:

-Польшаны, Венгрияны, Югославияны фашистерден азат еттік. 3 рет жаралы болдым, екі рет контузия алдым. Сонда да адам санын азайтпайын деп қатардан қалмай, әскермен бірге жүріп, 1945 жылдың 1-ші желтоқсанында соғыстан аман-есенк келіп, содан барып ауылшаруашылығында жұмыстандым осы уақытқа дейін. Менің Астанаға «ЭКСПО» көрмесіне баруыма жағдай жасап отырған азаматтарға алғысым шексіз. Ол азаматтарға менің жасымды берсін. Еліміз аман, жұртымыз тыныш болсын!