Жетібайда қарулы шабуыл жасаған күдіктілер ұсталды

«Жетібай кентінде бүтін бір отбасының үйіне оқ жаудырған қарулы топ қолға түсті. Полицейлер әзірге 5 күдіктіні ұстапты. Іздеуде жүрген тағы бір адам бар. Бұл туралы бүгін облыстық ішкі істер департаментінің өкілдері мәлімдеді»,-деп хабарлайды жергілікті облыстық телеарна.

Естеріңізге сала кетейік, тура бір апта бұрын беттерін тұмшалаған бір топ жігіт таңғы бестерде Жетібай халқының зәресін ұшырған еді. Біреудің шаңырағына оқ жаудырып, отбасы мүшелерін қырып сала жаздады. Бұзақылар оқпен бірге үйдің терезелеріне тас та лақтырыпты. Пәтер иесінің айтуынша, үйде ұйықтап жатқан бесіктегі 9 айлық сәби мен жүкті әйел оқтың дауысынан шошынып қалған.  Айдың күннің аманында қарулы топ үйлерге не мақсатта шабуыл жасағандығын қазір полицейлер анықтап жатыр. Осы жағдайға байланысты қылмыстық іс қозғалып, 6 күдіктінің бесеуі қамауға алынды.