Дарынды балалар Мәскеуден жүлдемен оралды

Түрлі пәндерді тереңдетіп оқытатын дарынды балаларға арналған мамандандырылған облыстық мектеп-интернатының оқушылары Ресей астанасы Мәскеуде өткен «Математика және жобалау» халықаралық ғылыми жобалар сайысынан жүлдемен оралды.

Әлемнің бірнеше елінен жиналған жас ғалымдар бәсекесінде маңғыстаулық дарынды балалар үздіктер қатарынан көрінді.Түрлі пәндерді тереңдетіп оқытатын дарынды балаларға арналған мамандандырылған облыстық мектеп-интернатының 6 оқушысы жүлделі орындарға ие болды. Атап айтқанда, С.Көшер, А.Жетіру, А.Бермухамедов, Ә.Темірханов, Б.Бектұров және А.Ермекбаевтар 5 алтын және 1 күміс алқаны қанжығаға байлап қайтты. Олардың зерттеген ғылыми жобалары өз салаларында үздік деп танылды. Оқушылардың жеңімпаз атануына мектеп-интернатының мұғалімдерімен қатар жоғары санатты математика пәнінің мұғалімі, «Үздік педагог – 2015» байқауының жеңімпазы Атамұратова Роза Жолдыбайқызы зор үлес қосты. Оқушылардың ғылыми жобаларына Роза Жолдыбайқызы жетекшілік етті.

Мектеп қабырғасында халықаралық байрақты бәсекеде алтыннан алқа тағып оралған оқушылардың құрметіне арналған салтанатты жиын өтті. Түрлі пәндерді тереңдетіп оқытатын дарынды балаларға арналған мамандандырылған облыстық мектеп-интернатының ұжымы, ұстаздар мен оқушылар жеңімпаздарға ақ тілектерін арнады.

Рысты Нұрбасинова, дарынды балаларға арналған мамандандырылған облыстық мектеп-интернатының директоры:

-Жоғары санатты математика пәнінің мұғалімі Роза Атамұратованың жетекшілігімен бірнеше оқушымыз халықаралық ғылыми жобалар сайысында жүлдегер атанды. Осылайша мектебіміздің мерейін үстем етті. Бұл жеңіс тек Маңғыстау облысы үшін ғана емес, еліміз үшін де үлкен абырой. Аталмыш жетістік еліміздегі білім саласында жасалап жатқан жүйелі жұмыстар мен тынымсыз еңбектің нәтижесі деп білемін.

Түрлі пәндерді тереңдетіп оқытатын дарынды балаларға арналған мамандандырылған облыстық мектеп-интернатында 436 оқушы білім алады.

Клара Нармұхамедова,

Директордың тәрбие ісі жөніндегі орынбасары