Ертеңнен бастап Ақтау әуежайында барлық ішкі әуе рейстері уақытша тоқтатылатын болады

31 Марта 2020 (20:23) | 1567 | Автор: Нурганым Имашева

Бұл туралы бүгін Маңғыстау облысының қоғамдық коммуникация орталығында өткен брифингте Ақтау халықаралық әуежайының директоры Ерғазы Жолдасов мәлімдеді.

30 наурыз күні Ақтаудан Атырау мен Ақтөбеге жолаушылар ұшағы ұшып, бір айға дейін уақытша тоқтатылды. Ертең ел ішіне ұшатын соңғы «Ақтау-Көкшетау-Ақтау» әуе рейсі көкке көтеріледі.

- Үкіметтік комиссияның қаулысы бойынша енді тек жүк тасымалдайтын ұшақтарды қабылдай аламыз және әскери ұшақтар ұшуы мүмкін. Олар мемлекеттің тапсырмасымен ұшады,-деді Ақтау халықаралық әуежайының директоры Ерғазы Жолдасов.

Директордың айтуынша, барлық ұшақ жолаушыларын арнайы киім киген эпидемиолог мамандар қарсы алып, тепловизормен тексеріліп жатыр. Жолаушылардың тізімі алынып, оның қайдан, қашан отырғаны жазылып алынды.

Айта кетейік, 27 наурыз күні Ақтау әуежайында барлық халықаралық әуе рейстері тоқтатылған болатын.

Видео Маңғыстау облысының қоғамдық коммуникация орталығынан

Сурет редакция мұрағатынан