1 шілдеден жұмыс берушілер медициналық сақтандыру жарнасын төлей бастайды

Елімізде 1 шілдеден жұмыс берушілер медициналық сақтандыру жарнасын төлей бастайды. Биыл бұл жарнаның көлемі төлемдері аудару нысанынан 1% құрап отыр. Бүгін  Денсаулық сақтау министрі Мәжіліс депутаттардың назарына бірқатар заңдарға енгізілген өзгерістерді ұсынды.

Денсаулық сақтау министрі Елжан Біртанов мәжілісімендерге 6 Кодекс пен 16 заңға өзгерістер енгізу туралы заң жобасын ұсынды.  Оның ішінде қызу талқыланғаны Міндетті әлеуметтік медициналық сақтандыру жөніндегі заң жобасы болды.  Атап айтқанда, министрлік төленетін жарналардың көлемін азайтуды ұсынады.

 Елжан Біртанов, ҚР Денсаулық сақтау министрі:

 -Қазір еліміздегі экономикалық ситуацияға байланысты. Өздеріңізге мәлім, экономикалық ситуация жеңіл емес. Осы мәселе бойынша біз бір жылдан астам кәсіпкерлік палаталармен және Ұлттық экономика өкілдерімен жұмыс істедік. Түрлі зерттеу жұмыстар жасап, осындай ставкаларды төмендету бойынша шешім қабылдадық. Бірақ бұған қарамастан қордың жауапкершілігі төмендемейді.

Жаңа заң аясында 2018 жылдың 1 қаңтарынан бастап халықтың әлеуметтік-қорғалмаған тобына мемлекет – 3,75%, 2019 жылдан бастап – 4%, 2022 жылдан бастап 5% артық емес мөлшерде жарна белгілеу ұсынылып отыр.  Ал жұмыс берушілердің жұмысшыларға бөлетін жарналарының көлемі 2017 жылы 1 шілдесінен бастап 1 пайызды құраса, 2022 жылы бұл көрсеткіш 3 пайызға дейін көбейеді. 

Зәуреш Аманжолова, ҚР Парламенті Мәжілісінің депутаты:

-Тек мемлекеттік мекемелер ғана емес, мемлекеттік емес жекеменшік мекемелер де қатысады бұл системаға. Сол үшін олар қазір аккредитациядан өтіп жатыр. Сондықтан адам қайда барса, фонд сонда төлейді.

 Қазіргі қолданыстағы заң бойынша мемлекет 12 санаттағы азаматтардың жарнасын төлеуді мойнына алған. Енді бұл тізім кеңейе түспек.  Енді 18 жасқа дейінгі мүгедекті күтіп бағатын жұмыссыз тұлға мен оралман ағайын тіркеуден соң бір жылға жарнадан босатылады.