Тыйым салынған уақытта арақ сатқан

Елімізде кешкі 21.00-ден келесі күнгі сағат 12.00-ге дейін спирттік ішімдік сатуға тыйым салынған. Заңды бұзғандар әкімшілік жазаға тартылады.

Маңғыстау облысы, Жаңаөзен қаласының мамандандырылған әкімшілік  сотында А-ға қатысты тап осындай әкімшілік іс қаралды.

Сот отырысында анықталғандай,  А. Түнде яғни сағат 01:00 шамасында, Жаңаөзен қаласы, Рахат-2 шағын ауданы, №9 көшеде орналасқан «Аян» азық-түлік дүкенінде азамат С-ға бір дана «Парламент» 0,5л. арағын 700 теңгеге сатқаны анықталған.

Сот қаулысымен  А. Қазақстан Республикасының ӘҚБтК 200-бабының 3-бөлігімен (этил спиртінің көлемді үлесі отыз пайыздан асатындарын: сағат 21:00 ден келесі күнгі сағат 12:00 дейін  бөлшек сауда арқылы өткізуге тыйым салынады)  кінәлі деп танылып, 10  айлық есептік көрсеткіш мөлшерінде 21 210  теңге әкімшілік айыппұл жазасы қолданылды. Қаулы заңды күшіне енді. Бұл туралы Жаңаөзен қаласының мамандандырылған әкімшілік сотының баспасөз қызметі хабарлады.