Фотобайқау жеңімпаздары анықталды

Ақтау қалалық Ауған соғысы ардагерлері «Бауырлас жауынгерлер» қоғамдық бірлестігінің ұйымдастыруымен «Ардагерлер жанымызда» фотобайқауы өткен болатын. Байқау жеңімпаздарын марапаттау салтанаты кеше облыстық «Арман» жастар орталығында ұйымдастырылды.

Қазылар алқасының шешімімен 1-орынға Абылай Саматұлы лайық деп танылды. Екінші орын Рысгүл Рамазановаға бұйырса, үшінші орынды «Маңғыстау-Медиа» ЖШС қызметкері Ақерке Гагаринқызы мен Фатима Ахмет өзара бөлісті. Сонымен қатар Дәурен Бұғабаев, Асылхан Көбегенова, Нұрзия Эмирова ынталандыру сыйлықтарымен марапатталды.

-Байқаудың өткізілетінін интернеттен оқыдым. Қатысып, бағымды сынап көргенді жөн санадым. Майдан даласына бозбала шағында аттанып, елімізді жаудан қорғаған батыр аталарымыздың ерлік істерін жастарға насихаттап, олардың өмірінен фото арқылы көрсету менің сүйікті ісім. Бос уақытымда жаныма жақын дүниелерді фотоға түсіргенді ұнатамын. Сондай бір топ суреттерді байқауға жолдаған болатынмын. Бүгін жеңімпаз атанып, қуанып тұрмын. Бір қызығы, «Бауырлас жауынгерлер» қоғамдық бірлестігінің фотобайқауы-мен қатысқан алғашқы фотобайқау және алғашқы жеңісім,-дейді Ақерке Гагаринқызы.

Шарада сөз алған қоғамдық бірлестіктің төрағасы Мәтжан Шаулиев, байқауға белсене қатысқан жеңімпаздарға алғысын білдірді. Тәуелсіздік күніне орай 1986 жылы желтоқсан оқиғасына қатысушы, аймаққа белгілі дәрігер Тоқтар Әжіғұловқа Б. Момышұлының «Батыр шапағаты» медалін және өлкеге белгілі азамат Әли Сахимовқа әскери қолбасшы, қазақ батыры «Сабыр Рахимовтың» орденін табыстады.