Ұлттық компанияның 51 пайыз акциясы сатылмақ

«Қазақтеңізкөлікфлоты» ұлттық компаниясының 51 пайыз акциясы сатылатын болды. Оның құны шамамен 60 млн долларға бағаланып отыр. «Басшылыққа жаңа инвесторлардың келуі ұлттық теңіз кеме қатынасы компаниясының дамуына тың серпін беріп, жаңа флот құруға жол ашады»,-деді компанияның бас директоры Марат Орманов.

Соңғы кездері Каспийдегі мұнай тасымалының көлемі төмендеп кеткен. Сондықтан да Қазақстан отандық танкерлерді шетелдегі өзге бағыттарға тартуға мәжбүр. Басшылық «Қаржысы мол шетел инвесторлары келсе, тығырықтан шығып, компания мол жетістіктерге жететін болады»,-деген сенімде. Бүгінде ұлттық компания меншігінде 12 мың тонналық 21 мұнай тенкері мен жүк кемелері бар. Олардың жартысы Каспий теңізінде қызмет етсе, қалғаны Қара теңіз бен Жерорта теңіздерінде жүк тасымалдап жүр. Жалпы, Ақтау халықаралық теңіз портынан жөнелтілетін мұнайдың 80 пайызын «Қазақ теңіз көлік флоты» компаниясы тасымалдайды. Енді олар жаңа стратегиялық әріптестерімен бірлесіп, тың инвестициялық жобаларды жүзеге асыруды көздеп отыр.

Марат Орманов, «Қазақтеңізкөлікфлоты» ұлттық компаниясының бас директоры:

-«Қазмұнайгаз» біздің компанияның 49 пайыз акциясын екі рет сатылымға шығарды. Алайда шетелдік инвесторлар үлестің басым бөлігіне иелік еткісі келеді. Сондықтан да бұл жолы акциямыздың 51 пайызын сатуды ұйғардық. Инвестор мол қаржы құяр болса көптеген жобаларды жүзеге асырар едік. Мәселен біз қазір тек мұнай тасымалымен ғана айналысамыз. Паром мен құрғақ жүктерді де тасымалдауды қолға алатын болсақ, еліміздегі жалғыз теңізде тасымалдаушы компанияның мүмкіндігі артып, қарыштап дамитын болады.