Маңғыстаулық боксшы қазақстан чемпионы атанды

Маңғыстау ауданына қарасты Тұщықұдық ауылының тумасы Ниязбай Адайбек Ақтөбе қаласында өткен байрақты бәсекеде топ жарды.

Ақпан айының 1-6 аралығында бокстан ҚР чемпионаты өтіп, жас спортшы Маңғыстау облысының намысын қорғады. 2005-2006 жылы туған жасөспірімдер арасында өткен жарыста 54 келі салмақта Ниязбай Адайбек 4 қарсыласынан оза шауып, шаршы алаңда 1-орынды жеңіп алды.

Қуанышты хабармен ауылға жеткен жас спортшыны ауыл әкімі, жерлестері мен жанкүйерлері Шетпе теміржол вокзалынан күтіп алды. 

Айта кетейік 2014 жылы Тұщықұдық ауылында спорт кешені ашылып, Ниязбай Адайбек бокс үйірмесінде жаттығады. Аудандық, облыстық жарыстарға қатысқан ол былтыр Қазақстан Республикасы чемпионатында 2 орынды иеленді. Биыл чемпион атанып, спорт шебері атағын қорғаған Ниязбай Адайбек пен бапкеріне сәттілік тілейміз!

Мұнайлы ауданы әкімдігінің баспасөз қызметі