Әскери теңіз айлағының әлеуеті артып келеді

Ақтаудағы әскери мақсаттағы теңіз айлағының әлеуеті артып келеді. Таяу жылдары алып кораблдерді қабылдау мақсатында теңіз түбін тереңдету жұмыстары жалғасып жатыр. Стратегиялық маңызға ие нысан Қазақстан теңіз қақпасының аумағында орналасқан. Елімізге судан келер қатерге тосқауыл болатын қалқанның іргесі нық, айбыны асқақ. Аумағы екі гектарға жуық айлақта Қазақстан әскери теңіз күштерінің кораблдері сап түзеп тұр. Тәуелсіздік жылдары тұңғыш рет қолданысқа берілген кешен мемлекеттік шекара күзетінің жауынгерлік кемелерін де қабылдайды. Мұнда бір мезгілде оннан астам су көлігі аялдайды. Әскери айлақтың қала іргесінде бой көтеруімен жауынгерлік кемелердің ашық теңізге шығуы төрт сағатқа қысқарды. Сондай-ақ, облыс орталығында тұратын теңізшілердің жұмыс орнына қатынау қиындығы оң шешімін тапты.

Асқар Қапашов, «Орал» зымыранды-артиллериялық кемесінің командирі:

-Әскери айлақ Каспий теңізінің Қазақстандық бөлігінің қақ ортасында орналасқан. Осыған сәйкес, жауынгерлік кемелер барлық бағыттарға шұғыл шыға алады. Өзіндік инфрақұрылымы қалыптасқан кешенде еліміздің әскери флоты орналасқан. Бұған дейін олар Түпқараған ауданы Баутино портында шоғырланып келген еді .