Өзін-өзі атып өлтірген полицей ісі тергелуде

Өзін-өзі атқан полицей қыздың өліміне қатысты кешенді сот-дәрігерлік сараптамасы тағайындалды. Бұл туралы Маңғыстау облыстық ІІД баспасөз қызметінің өкілі Шолпан Юлдашева хабарлады.

Қайғылы оқиға жексенбі, яғни 20 желтоқсан күні Ақтау қалалық әкімдігінде болған. Өзіне бөлінген қызметтік қарудан оқ атқан күзетші – полиция лейтенанты, 1983 жылы туған әйел оқиға орнында қаза тапты. Оның денесі Ақтау қалалық әкімдігінің 3-қабаттағы әйелдерге арналған әжетханасынан табылған. 19 желтоқсан күні кешкі сағат 18.00 жұмысқа түскен 32 жастағы күзетші таңертең сағат 9-да кезекшілікті тапсыруы тиіс болған.

Күзет қызметкерінің өзіне қол жұмсауына не түрткі болғандығы әзірге белгісіз. Облыстық ішкі істер департаменті қызметкерлерінің айтуынша, марқұм қатерлі ісікке шалдыққан. Сондықтан да оның бұл өмірмен қоштасуына жанынан батқан ауыр дерті себеп болуы мүмкін, деген болжам айтылуда. «Оқыс оқиғаның нақты себебі сот-дәрігерлік сараптама қорытындысынан кейін белгілі болады»,-деді ішкі істер департаментіндегілер.