Ақтауда күннен қуат алатын жаңа зауыт салынады

Фото с сайта thinkgreen.ru

Ақтау қаласында энергияның баламалы көздерін дамыту қолға алынбақ. Шаһарда күн сәулесінен қуат алатын жаңа зауыт салынатын болды. Бұл туралы Орталық коммуникациялар қызметінің Маңғыстау облыстық филиалында өткен брифингте қала әкімі Серікбай Трұмов мәлімдеді.

Қуаттылығы 50 мегаватт болатын зауыттың құрылысы инвесторлардың қаражатымен бой көтермек. Электр станциясының жанынан теңіз суын тұщытатын кәсіпорын да қоса тұрғызылады. Бүгінгі таңда шетелдік инвесторлармен жобаны жүзеге асыру туралы меморандумға қол қойылған. 160 гектар жер бөлініп, жобалық-сметалық құжаттары да әзірленіп жатыр. «Ақтау қаласы үшін бұл зауыттың маңызы аса жоғары болмақ», - дейді қала басшысы. Өйткені, қазір облыс орталығы солтүстік-батысқа қарай кеңейіп, жаңа шағынаудандар бой көтеруде. Жыл соңына дейін «Қолжетімді баспана-2020» мемлекеттік бағдарламасы аясында 867 тұрғын үйді ел игілігіне беру жоспарланған.

Серікбай Трұмов, Ақтау қаласының әкімі:

 -Қазіргі таңда 33-ші шағынауданда 4 үйдің құрылысы жүргізіліп жатыр. Барлығы 700-ден астам пәтер салынуда. Бұларды жылдың соңына дейін аяқтап, тапсыруды жоспарлап отырмыз. 283 пәтерін кезекте тұрғандарға бөлеміз. Қалғанын Қазақстанның «Тұрғын үй жинақ банкі» өздері бөлетін болады.