Ақтауда зорлық-зомбылықтың алдын алу мәселесі талқыланды

Ақтауда қала әкімі жанындағы Аналар кеңесі және отбасылық-демографиялық саясат жөніндегі комиссия мүшелерінің қатысуымен «Зорлық-зомбылыққа қарсы 16 күн белсенділік» акциясы аясында ата-аналармен және оқушылармен кездесу өтті, деп хабарлайды қала әкімдігінің баспасөз қызметі.

Аталған акция 25 қараша-10 желтоқсан аралығында өткізіледі. Ақтау қалалық ішкі саясат және тілдерді дамыту бөлімінің ұйымдастыруымен өткен шараға №24 жалпы білім беретін мектептің жоғары сынып оқушылары мен ата-аналары қатысты. Ақтау қаласы әкімі жанындағы Аналар кеңесі және отбасылық-демографиялық саясат жөніндегі комиссия мүшелері ата-аналар мен оқушыларға зорлық-зомбылықтың түрлері мен алдын алу жолдарын түсіндірді.

-Оқушылар мен ата-аналарға зорлық-зомбылық мәселесі туындаған кезде қандай іс-әрекеттер жасау қажеттігі айтылды. Зорлық-зомбылық мәселесін шешу жолдары түсіндірілді. Бұл шара алдағы уақытта басқа білім беру ұйымдарында да ұйымдастырылады, - деді Ақтау қалалық аналар кеңесінің мүшесі Жібек Ахметова.