Президенттік жастар кадр резервіне іріктеу 1 қыркүйектен басталады

31 Августа 2023 (12:06) | 2113 | Автор: Редакция

Маңғыстау облысында президенттік жастар кадр резервіне іріктеу 1 қыркүйекте өтеді. Бұл туралы Қоғамдық коммуникация орталығында өткен брифингте Маңғыстау облысы бойынша мемлекеттік қызмет департаментінің басшысы Тоқтамыс Жұмағұлов хабарлады.

Спикердің айтуынша, үшінші іріктеудің ерекшелігі мемлекеттік аппараттың салалық кадрларға қажеттілігін ескере отырып, мақсатты іріктеу жүргізу болмақ. Осылайша, кезекті іріктеу 6 негізгі сала бойынша жүзеге асырылады:

• Инфрақұрылымды, өнеркәсіпті дамыту және сауда саясаты;

• Агроөнеркәсіптік кешен және қоршаған ортаны қорғау;

• Сыртқы саясат және инвестициялар;

• Экономикалық және қаржылық саясат;

• Цифрландыру;

• Әлеуметтік саясат және азаматтық қоғам;

Сондай-ақ биыл үміткерлермен әңгімелесуді міндетті түрде салалық орталық органдар өкілдерінің қатысуымен өткізу тәжірибесі енгізілуде.

- Талаптарға сәйкес, іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, мемлекеттік тілді В1 деңгейінен төмен емес меңгерген Қазақстан Республикасының азаматы қатыса алады. Президенттік жастар кадр резервінің мүшесі болу үшін үміткерлер 6 кезеңнен тұратын кешенді іріктеуден өтуі тиіс. Кандидаттарды бағалау нәтижелері олардың жеке кабинетінде және кезең қорытындысы бойынша pkrezerv.gov.kz жарияланып, барлық азаматтар үшін қатысушылар туралы ақпарат қолжетімді болады,- деді Тоқтамыс Жұмағұлов.

Атап өту керек, 2019 және 2021 жылдары резервке алынған 350 адамның 264-і мемлекеттік органдар мен квазимемлекеттік сектор ұйымдарында жұмыс істейді, яғни жалпы санның 75%-ы жұмысқа орналастырылған.