Ақтаулық оқушылар саяхатқа шықты

Наурыз мерекелерінің аясында Ақтау қаласындағы «IntellekUM» мектеп-лицейінің 1 «ә» сынып оқушылары экскурсияға шықты.

Облыстық қуыршақ театрынан басталған саяхат  Ә.Кекілбайұлы атындағы Маңғыстау облыстық тарихи-өлкетану музейінде және Қ.Сыдиықов атындағы облыстық әмбебап кітапханасында жалғасты. 

Танымдық бағдарлама барысында балалар театр қабырғасында «Сен және мен немесе отпен ойын туралы шынайы оқиға» атты қойылымды тамашаласа, мұражайдың алты залында өлкенің бай жәдігерлерімен, археологиялық мұралармен, аймақтың ерекше фауна және флора коллекцияларымен, этнографиялық бұйымдармен және көне дәуірде өмір сүрген жан-жануарлар тарихымен танысты.

Музейдің экспозициялық залдарын шолып шыққан бүлдіршіндердің қызығушылығы кітапхананың балаларға арналған бөлімінде ерекше арта түсті. Мұнда ертегілер және балалар кітаптарымен, әр түрлі көрнекіліктермен танысып шыққан соң, шахмат үйірмесінің жетекшісі шәкірттер арасында өзара ойын өткізіп, ережесімен таныстырды.

Аталған экскурсия ата-аналардың бастамасымен ұйымдастарылып, мектеп басшылығынан, сынып жетекшісінен қолдау тапқаны қуантады. Оқушының зейінін ашып, ой-өрісін кеңейту, санасына ұлттық құндылықты сіңдіру жолында осындай игі іс-шаралар алдағы уақытта да жалғасын таппақ.