Маңғыстаулық кикбоксерлер Әлем чемпионатынан жүлделі орындарға ие болды

Маңғыстаулық кикбоксерлер Әлем чемпионатынан 5 жүлделі орынға ие болды, деп хабарлайды Қоғамдық коммуникация орталығы облыстық спорт басқармасының баспасөз қызметіне сілтеме жасап.

30 қыркүйек пен 8 қазан аралығында Италияның Лидо ди Езоло қаласында
кикбоксингтен жастар және кадеттер арасында Әлем чемпионаты өтті. Әлемдік додаға 63 мемлекеттен 735 спортшы қатысты.
Маңғыстаулық кикбоксерлер ел қоржынына 3 күміс, 2 қола жүлде салды.

МО кикбоксингтен аға жаттықтырушы Төремұрат Селиковтың айтуынша күміс жүлдені жастар арасында фулл-контакт бағдарламасы бойынша +91 келі салмақта Нұрсәт Ғалымбекұлы және 75 келі салмақта Әнуар Бақытжанұлы иеленсе, К-1 бағдарламасы бойынша Ақжол Косибаев иеленді.

Сондай-ақ, жастар арасында лоу-кик бағдарламасы бойынша 86 келі салмақ дәрежесінде Ерасыл Досан және кадеттер арасында 48 келі салмақ дәрежесінде Аманбек Ерікұлы қола жүлдегер атанды.