Жергілікті маңыздағы жолдардан ақаулықтар анықталды

ҚР Индустрия және инфрақұрылымдық даму министрлігінің «Жол активтері ұлттық сапа орталығы» республикалық-мемлекеттік кәсіпорны Маңғыстау облысы бойынша филиал қызметкерлері 2022 жылдың алғашқы жартыжылдығында жергілікті маңыздағы трассаларда 39 рет бақылау рейдін өткізді, - деп хабарлайды уәкілетті мекеменің баспасөз қызметі.

Нәтижесінде 570-тен астам сынамалар алынып, олардың құрамы зертханалық жолмен талданды. Солардың 10%-і техникалық норматив талаптарына сәйкес келмей шықты. Сондай-ақ 10-нан астам әртүрлі ақаулықтар анықталды.  

Айталық, Маңғыстау ауданында жүргізілген бақылау шараларының қорытындысы мүлдем көңіл көншітпейді.

«Қайта жаңғырту жұмыстары жүріп жатқан «Шетпе-Қызан» тас жолының 49-85 шақырымында (Тасмұрын-Мәстек учаскесі) асфальт жабындының қалыпты формасы бұзылған жерлер анықталды. Ойылып кеткен және жиегі бұзылған жол бөлігі жиі кездесті. Тіптен, үстіңгі қабаты жарылып, үгітіле бастағандары да бар. Бұл аумақта мердігер мекеме - «Altynzhol group» жұмыс жасауда. Аталған серіктестікке барлық кемшіліктер көрсетіліп, қызметтік хат жолданды» - деді сарапшылар.

Фото ұлттық жол сапа орталығынан.