Ақшымырау ауылында асық ату мен шағын футболдан жарыс өтті

Маңғыстау ауданына қарасты Ақшымырау ауылында асық ату мен шағын футболдан жарыс өтті, деп хабарлайды Қоғамдық коммуникация орталығы Маңғыстау ауданы әкімдігінің баспасөз қызметіне сілтеме жасап.

Спорттық шара қасиетті құрбан айт мерекесіне орай 9 шілде күні ұйымдастырылған. Мектеп оқушылары мен ауыл балалары арасында өткен жарысты Тобанияз атындағы орта мектепті 2003 жылы бітірген түлектер ұйымдастырған. Шағын футболға 9 команда қатысса, ұлттық ойын асық атуға да оннан астам бала қатысқан.

Үшінші орынды 11-сынып оқушыларынан құралған «2006» командасы алса, екінші орын 8 сыныптың «Болашақ» командасына, бірінші орын 10 сынып оқушыларынан құралған «Жалын» командасына бұйырды. Жеңімпаз командалар мен үздік ойын көрсеткен жекелеген қатысушыларға ұйымдастырушылар тарапынан алғыс хат пен ақшалай сыйлық табысталды.

Айта кетейік, ақшымыраулық жастар мектеп бітіргендерінің 20 жылдығана орай, «20 жылдыққа 20 игі шара» атты ерекше жоба бастаған болатын. Бұл жарыс олардың төртінші шарасы.