Маңғыстаулық каратэші әлем чемпионатында ІІ орын иеленді

 Маңғыстаулық каратеші Райымбек Шынтай киокушинкай каратэден өткен әлем чемпионатында жүлделі ІІ орын иеленді,- деп хабарлайды облыстық Қоғамдық коммуникация орталығы.

Киокушинкай каратэден 6-шы әлем чемпионаты 4-5 маусым аралығында Испанияның Валенсия қаласында өткен. Оған әлемнің 39 елінен 465-тен астам спортшы қатысқан.

Жарыс төрт санат бойынша әйелдер мен ерлер, жастар мен жасөспірімдер арасында әртүрлі салмақ дәрежесінде өткен.

Соның ішінде Маңғыстау облысынан үш спортшы бағын сынап, нәтижесінде Райымбек Шынтай жүлделі екінші орын алды. Ол 16-17 жас аралығында 65 келі салмақ категориясында бақ сынаған.

-Райымбек 4 кездесу өткізді. Алғашқы үшеуінде қарсыластарына шек келтірмей жеңіп шықты. Төртінші кездесуде өзіміздің елден барған Теміртаулық спортшыға есе жіберіп алды, дейді спортшының жаттықтырушысы Берекет Нұрбаев.