Референдум кезінде Ақтау автобустарында жол жүру тегін болады

5 маусымда Ақтау қаласында қоғамдық көлікте жол жүру тегін болады, деп хабарлады қала әкімдігінің баспасөз қызметі.

Әкімдікте бұл шешім Қазақстанда жүргізіліп жатқан саяси науқан аясында қабылданғанын түсіндірді. Республикалық референдум елімізде 5 маусымда өтеді. Қазақстандықтарға олар қай учаскеге жататыны туралы смс-хабарламалар жіберілді. Конституцияның жаңа нұсқасында Президенттің өкілеттіктеріне, Парламенттің жұмысына, өлім жазасын жоюға және тағы басқаларға өзгерістер енгізу ұсынылады.

-5 маусымда республикалық референдумның өтуіне байланысты №№ 2, 3, 4, 4м, 5,7,8 қалалық маршруттық автобустарда жүру тегін болады, - деп хабарлады Ақтау әкімдігі.

Естеріңізге сала кетейік, бұған дейін 8 наурыз күні әйелдер үшін, наурыз бен оразаның құрметіне жол жүру тегін болатын.