Жаңаөзен қаласында ҰБТ-ға 1463 түлек қатысады

Жаңаөзен қаласының білім беру саласында 83 оқу орны жұмыс істейді. Олардың ішінде 27 жалпы білім беретін мектеп. Биыл аталған 27 мектептен 1482 түлек мектеп бітіреді. ҰБТ-ға қатысуға 1463 түлек ниет білдірді, деп хабарлайды Қоғамдық коммуникация орталығы.

Жаңаөзен қаласы әкімінің баспасөз қызметінің мәліметінше, биылғы оқу жылында «Алтын» белгіге 29, «Үздік» аттестатқа 137 оқушы үміткер. Ал, 2020-2021 оқу жылында 11 сыныпты бітірген 1379 оқушының 30-ы «Алтын» белгімен, 116 оқушы «Үздік» аттестатпен, 290 бала мемлекеттік білім грантына ие болды.

- Қазіргі уақытта түлектерге мамандық таңдау, кәсіби бағдар беру жұмыстары жүйелі жүргізілуде. Мектеп бітіруші 1482 оқушыға, ата-аналарына кәсіптік бағдар бойынша тест жүргізілді. 11 сынып оқушыларының ішінен аз қамтылған отбасы балаларын қолдау мақсатында ұлттық бірыңғай тестілеуге дайындау, кәсіптік бағдар беру жұмыстары New Format орталығында 165 түлекпен жүргізіліп жатыр,- дейді Жаңаөзен қаласы бойынша білім бөлімінің басшысы Ысқақ Құлатай.