Маңғыстау облысының білім беру ұйымдарында 98 маманға қажеттілік бар

Бұл туралы Қоғамдық коммуникация орталығында өткен брифингіде Маңғыстау облысы білім басқармасының басшысы Светлана Төлебаева айтты.

Оның мәліметінше, облыстағы білім беру ұйымдарында педагогтерге қажеттілік бар. 71 орыс тілі мен әдебиеті мұғалімі, 19 математика пәні мұғалімі және 8 орыс мектептеріндегі ағылшын тілі пәні мұғалімдері жетіспейді.

 «Білім беру саласын тиісті мамандармен қамтамасыз ету мақсатында жергілікті бюджеттен облыс әкімінің білім грантын қажетті пәндерге бөліп отырмыз», - деді Светлана Төлебаева.

 Спикердің айтуынша, қазір облыс әкімінің гранты бойынша барлығы 204 студент білім алып жатыр. 

 «2019 жылы республикалық бюджеттен аз қамтылған отбасылардың балаларына арналған 114 білім гранты педагогикалық мамандыққа бөлінді.  Жалпы өңірдің 1298 студенті педагогикалық мамандық бойынша республиканың жоғарғы оқу орындарында білім алуда. 2017-2021 жыл аралығында «Дипломмен ауылға» мемлекеттік бағдарламасы аясында 479 жас маман тұрғын үй алды, ал 490-ы біржолғы жәрдемақы алған», - деді Светлана Төлебаева.