Мұнайлылық 2 жарым мыңнан астам бала мектептердегі жазғы лагерге барды

Мұнайлы ауданында 2700 оқушы мектептердегі жазғы сауықтыру лагерлеріне барды. Бұл туралы Мұнайлы ауданы білім бөлімінің басшысы Батырбек Демократұлы мәлім етті.

Оның айтуынша, бұл лагерлерге 7-13 жас аралығындағы ата-анасының қамқорлығынсыз қалған, тұрмысы төмен, көп балалы отбасылардың балалары, мүмкіндіктері шектеулі, оқуда озат оқушылар тегін баруға мүмкіндік жасалған.

«Мектеп жанындағы лагерлерде балалар түрлі бағыт бойынша танымдық сабақтар өтеді, ойын ойнайды, қыдырады. Баланың 3 айлық демалысы бос өтпейді. Спортпен шұғылданады, дебаттық ойындарға қатысады, экологиялық жобалар жүргізеді. Мектеп жанындағы лагерлердің үшінші кезеңінде балалар теңіз жағалауына, киноға, музейге, қуыршақ театрына, ойын-сауық кешеніне ойын алаңына барып ойнайды. Қазір Мұнайлы ауданында 6 лагерь бар. Әр ауысым 12 күннен тұрады», - деді Батырбек Демократұлы.

Балалардың бос уақытын тиімді өткізіп, білім көкжиегін кеңейтуге арналған шаралар алдағы жылдары жалғасын табады.

Мұнайлы ауданы әкімдігінің баспасөз қызметі