Облыс көлемінде құрылысы жүріп жатқан көлік жолдарынан 103 ақаулық табылды

25 Апреля 2020 (13:48) | 1302 | Автор: Нурганым Имашева

Жол активтері ұлттық сапа орталығының Маңғыстау филиалының қызметкерлері биылғы жылдың алғашқы үш айында республикалық және жергілікті маңыздағы трассаларға 84 рет тексеру жұмыстарын жүргізді.

Жол құрылысы мен сапасын бақылаушылар аймақта салынып жатқан республикалық маңыздағы жолдарға 56 рет, жергілікті маңыздағы трассаларға 28 рет барып, сынамалар алған еді.

-Қажетті құрал-жабдықтардың көмегімен жол құрылысында қолданылған 160 материал алынды. Өкінішке қарай, біз күткен кемшіліктер тағы да анықталып отыр.

Мәселен, республикалық маңызға ие автомобиль жолынан алынған бес сынаманың сапасы нормативтік құжаттар талабына сәйкес келмей шықты. Ал жергілікті жолдардан табылған олқылық бұдан он есе көп. Іріктеліп алынған 155 жол материалының 56-сы қолданысқа жарамсыз, - дейді филиал қызметкерлері.

Осы мәліметтермен бөліскен «Жол активтері ұлттық сапа орталығы» РМК МОФ баспасөз қызметінің мәлімдеуінше, биылғы жылдың алғашқы тоқсанында облыс көлемінде жол салудың сапасын тексеру кезінде 103 ақаулық табылып отыр. Оның жүзге жуығы республикалық маңыздағы трассаларға қатысты.

-Анықталған кемшіліктерді тез арада түзету үшін жол салушы мердігер мекемелер мен оларға тапсырыс беруші мемлекеттік мекеме-кәсіпорындарға 46 рет қызметтік хат жолданды,-деп хабарлайды баспасөз қызметі.

Суреттерді түсірген баспасөз қызметі