МАҢҒЫСТАУ ОБЛЫСЫНДА АУЫЛДЫҚ ЖЕРДЕГІ ӘЙЕЛ КӘСІПКЕРЛЕРГЕ АРНАЛҒАН ОҚЫТУ СЕМИНАРЫ ӨТТІ

4-5 шілде күндері Маңғыстау облысының Ақтау қаласында ауылдық жердегі әйел-кәсіпкерлерге арналған семинар өтеді. «Ауылдық жерлерде әйелдер кәсіпкерлігін дамыту» атты тегін шеберлік сабағы Азия даму банкінің қолдауымен «Атамекен» ҚР ҰКП ұйымдастырылды.

Іс-шараның басты мақсаты – әйелдер кәсіпкерлігін қолдау, сондай-ақ ауыл әйелдерінің әлеуметтік-экономикалық әлеуетін дамыту.

Семинарға облыстың барлық ауданынан 60-қа жуық әйел кәсіпкер қатысады деп жоспарланған. Олардың қатарында шаруа қожалықтарының басшылары, өндірістік кәсіпорындардың басшылары мен жеке кәсіпкерлер бар. Екі күндік оқытуда бизнес-тренер тәжірибелік тапсырмалар мен кейстер арқылы әйелдерді кәсіпкерлік негіздеріне, бухгалтерлік және басқару есебіне үйретеді, салық пен инвестиция тарту сұрақтарына жауап береді. Сонымен бірге тыңдаушылар жеке брендті дамыту маңыздылығын, пиар жұмысын үйлестіру мен интернет-маркетинг негіздері туралы біліп қайтатын болады.

Оқыту аясында қатысушыларға Қазақстандағы бизнесті жүргізудегі қаржылай және қаржылай емес қолдау туралы Кәсіпкерлер палатасының мамандары таныстырады. Ал кәсіпкерлікті қолдау бағдарламалары жөнінде «Даму» кәсіпкерлікті дамыту қоры» АҚ өңірлік филиалының қызметкерлері кеңінен тоқталады.

Сонымен бірге екінші деңгейлі банктер мен шағын несиелік ұйымдардың өкілдері нәзік жанды іскерлерге шағын және орта бизнес субъектілерінің жобаларын қаржыландыру бағдарламалары мен оларға қатысу шарттарын түсіндірді.

Қатысушылар өз кезегінде семинардың кәсіби біліктіліктерін көтеру үшін қажетті шара екенін, сондай-ақ, ауылдық жерлерде жаппай кәсіпкерлікті дамыту идеясын танымал етудің маңыздылығын атап өтті. Жалпы өңірде 52 мың кәсіпкерлік субъектісі тіркелген, оның 50% жуығы әйелдердің еншісінде.

Айта кету керек, Азия даму банкінің қолдауы шеңберінде «Атамекен» ұйымдастыруымен тегін оқу семинарлары еліміздің 15 өңірінде өтеді.

* Азия даму банкі /АДБ/ кедейлікті жою мақсатында Азия-Тынық мұхиты өңірінің дамыған, интеграцияланған, өміршең және тұрақты болу жолында жұмыстанып келеді. 2018 жылы АДБ 21,5 млрд. АҚШ доллары көлемінде грант пен қарыз берді. Банк 1966 жылы құрылды және оның акционерлері 68 ел болып табылады. Қазақстан 1994 жылы АДБ-ға мүше болды және өз экономикасын дамыту үшін5 млрд. АҚШ доллары көлемінде тәуелді және тәуелсіз заемдар, кепілдіктер және техникалық көмек алды.

Суретті түсірген өңірлік кәсіпкерлер палатасының баспасөз қызметі