Алдын алуға ұмтылыс

Маңғыстау облысы бойынша ҚАЖ департаментіне бағынысты ГМ-172/10 мекемесінде өрт қауіпсіздігін сақтау, төтенше жағдайдың алдын алу, өрт сөндіру құралдарын мекеменің қызметкерлерінің дұрыс пайдалана білуін пысықтау мақсатында алдын алу шарасы өтті.

Шараға арнайы келген Ақтау қалалық төтенше жағдайлар басқармасының аға инженері азаматтық қорғау аға лейтенанты Наурызов Рақымжан Ақкөлұлы, ГМ-172/10 мекемесі бастығының тәрбие жұмыстары жөніндегі орынбасары әділет майоры Нұржан Жайлыбаев және аталған мекеменің қызметкерлері қатысты.

-Өмірде түрлі жағдайлар орын алуы мүмкін, еліміз бойынша да, өңірімізде де «тілсіз жаудан» зардап шегіп жатқандар бар. Осындай жағдайлардың алдын алу мақсатында, мекемемізде қызмет ететін, әсіресе, әйел азаматшалардың өртсөндіру құралдарын дұрыс пайдалану тәртібін үйренуі үшін осындай шараны ұйымдастырып отырмыз.

Мұндай жағдай тек қызмет барысында ғана емес, үй жағдайында да кездесіп қалуы мүмкін. Әрбір адам кез-келген төтенше жағдайға дайын болуы тиіс,- деп мәлімдеді аталған шараны ұйымдастырушы ГМ-172/10 мекемесінің «Режим және күзет бөлімінің» өрт қауіпсіздігі бойынша профилактикасының инспекторы әділет лейтенанты Жарылқапбаев Сәкен Қанатұлы.

Ақтау қалалық төтенше жағдайлар басқармасының аға инженері азаматтық қорғау аға лейтенанты Р.Наурызов тергеу изоляторының қызметкерлеріне өртсөндіру құралын төтенше жағдай орын алған жағдайда қалай дұрыс қолдану керектігін түсіндіріп, оны пайдалану тәртібіне, негізгі қағидаларына толық тоқталып өтіп, құрал-жабдықтың толықтай сипаттамасын беріп, қолдану бағытын көрсетті. Сонымен қатар, өртсөндіру құралының бірнеше түрі туралы әңгімелеп, олардың ерекшеліктері туралы айтып, өрт бола қалған жағдайда дұрыс іс-әрекет жасаудың жолдарына тоқталды.

Өрт орын алғанда бөлмеде қалып қойған жан не істеуі керек, дәлізде қалып қойған жағдайда қандай әрекеттер жасалуы тиіс - осылардың бәрін егжей-тежейлі түсіндірген маманның нұсқаулықтары мекеме қызметкерлерінің төтенше жағдайды еңсеру бойынша дағдыларын пысықтауға мүмкіндік беріп, экстремалды жағдайда шұғыл әрі батыл әрекет ете білудің маңыздылығын айшықтай түсті.

Төтенше жағдайлар саласы маманының нұсқаулығын мұқият тыңдаған ГМ-172/10 мекемесінің қызметкерлері ұнтақ шашқышты өртсөндіру құралын қолдарына алып, «шартты өртті» сөндіру барысында жабдықты өз беттерінше қолданып көрді.

Суреттер автордыкі