Каспий кәсіпкерлік орталығы ашылды

15 наурыз күні «Yessenov University»-де Амал мерекесі қарсаңында Каспий Кәсіпкерлік орталығының салтанатты ашылуы болып өтті.

Орталықтың ашылу салтанатына Иран, Әзербайжан, Түркменстан, Түркия елдерінің консулдары, Эстония, Корея елдерінен келген қонақтар мен Маңғыстау облысы кәсіпкерлері қатысты.

Орталықты алғашқы сөзімен университет ректоры Берік Бақытжанұлы Ахметов ашып берді.

Шараға қатысушы қонақтарға орталықтың жұмысы таныстырылды.

Бұл орталық тек университет студенттерінің ғана емес, сонымен қатар Каспий өңірі жастарының кәсіпкерлік бағыттағы жаңашыл идеяларын жүзеге асыруға қолдау көрсетеді.

-Мақсаты - кәсіпкерлік білім беру бағытында Каспий өңірі жастарының, жаңа бастаушы кәсіпкерлердің және оқытушылар құрамы арасында инновациялық және кәсіпкерлік әлеуетін арттыру, келешекте стартап идеяларды табысты бизнеске айналдыру. Бұл орталықта университетке оқуға келген студент өз мамандығы бойынша білім алып қоймай, өз бизнесін дамытуына мүмкіндік алады,- деп хабарлайды «Yessenov University» баспасөз қызметі.

Орталықта идеядан бастап қаржыландыруға дейінгі кезеңдерде қолдау көрсетіледі. Қазіргі таңда орталықта 7 стартап жоба жүзеге асырылуда.

Суреттерді түсірген «Yessenov University» баспасөз қызметі