Салауатты өмір салты үшін футбол ұйымдастырылды

Салауатты өмір салтын қалыптастыру, спортпен шұғылдану –деніміздің сау болуының басты  кепілі. Қазақстан Республикасы Судьялар Одағы Маңғыстау облыстық филиалының ұйымдастыруымен 7 мамыр – Отан қорғаушылар күні және 9 мамыр – Жеңіс күні мерекелеріне орай, маңғыстаулық судьялар мен сот қызметкерлері арасында салауатты өмір салты үшін шағын футболдан жарыс өтті. Бұл туралы біздің басылымға Маңғыстау облыстық сотының баспасөз қызметіхабарлады.

Турнирге облыстық, аудандық және оған теңестірілген соттардан 6 команда қатысып, сот жүйесінің ардагер футболшылары қазылық етсе, кәсіби спортшы мамандар төрелік етті.

Шағын футбол ұжымдық ойын болғандықтан, команда мүшелерінің бір-біріне деген ауызбіршілігі мен түсіністігі аса қажет. Бұл бәсекеде барлық қарсыластарын ұтқан, «Әділет» командасы жеңімпаз атанып, бірінші орынды  иеленді.

Ал, екінші орынға  «Азаттық» командасы жайғасса, үшінші орынға  «Бейбітшілік» тобы тұрақтады. Сондай-ақ, белсенді ойын көрсеткен команда мүшелері де назардан тыс қалмады. Маңғыстау облыстық сотының маманы  Т.Зәкір «Үздік шабуылшы» атанып, Ақтау қалалық сотының төрағасы М.Кенжалиев  «Үздік қорғаушы» номинациясымен марапатталды.

Спорттық-шара соңында Қазақстан Республикасы Судьялар Одағы Маңғыстау облыстық филиалының төрағасы Рақымжан Бейсенов жүлдегер командаларды құттықтап,  жеңіс  кубогы мен дипломдарды табыс етті.

Суреттері түсірген Маңғыстау облыстық сотының баспасөз қызметі