Келінін пышақтап, 9 жылға сотталды

Маңғыстау облысының қылмыстық істер жөніндегі мамандандырылған ауданаралық сотында ҚР ҚК-нің 24-бабының 3-бөлігі, 99-бабының 1-бөлігімен айыпталған Х-ға қатысты қылмыстық іс қаралды.

Сотта анықталғандай, Х. Ақтау қаласы, Өмірзақ ауылындағы пәтеріне спирттік ішімдік ішіп, мас күйінде келеді де, өзінің інісінің әйелімен келіспей қалады. Арада үлкен ұрыс туады. Келіні қайынағасының мас күйінде жүріп, өз күйеуін де ішімдік ішуге үйрететінін айтады.

Х. осы келіспеушілікті сылтау қыла отырып, қасақана, басқа адамның құқығына қарсы қаза келтіру мақсатында, ас үй бөлмесінен асханалық пышағын алып, жәбірленушіге қолындағы пышағымен кеуде тұсынан бірнеше рет және ішкі бөлігінен бірнеше рет соққы беріп, дене жарақатын салған. Келінін 11 жерінен пышақтайды.

Жәбірленуші сотталушы Х-ның келтірген соққыларынан ауыр дене жарақаттарын алып, кеудесі мен ішінен қан кетеді. Дер кезінде ауруханаға жеткізіліп, медициналық жәрдем көрсетілуінің арқасында жәбірленуші тірі қалған.

«Сот үкімімен көрсетілген баптар бойынша Х. кінәлі деп танылып, оған 9 жыл мерзімге бас бостандығынан айыру жазасы тағайындалған. Үкім заңды күшіне енді»,-деп хабарлайды Маңғыстау облысының қылмыстық істер жөніндегі мамандандырылған ауданаралық сотының баспасөз қызметі.