Облыстық сотта қос мерекенің құрметіне арналған салтанатты жиын өтті

Баспасөз қызметінің хабарлауынша, Маңғыстау облыстық сотында 7 мамыр – Отан қорғаушылар күні және 9 мамыр – Жеңіс күні мерекелеріне арналған салтанатты жиын өтті.Аталған жиынға Маңғыстау облыстық сотының төраға м.а. Нұрсапа Примашев, аудандық және оған теңестірілген соттардың төрағалары, доғарыстағы судьялар және Соттар әкімшісінің басшысы мен сот қызметкерлері қатысты.

Маңғыстау облыстық сотының төраға м.а. Н.Примашев:

-Бұл мереке  – жанқияр ерліктің, еңселі елдіктің рухы өрлеп, жеңіс жалауы мәңгілік желбіреген күн болып, тарих беттеріне алтын әріптермен жазылды. Қан майданда қаза тапқан майдандас достарының аманатын арқалап, елге пана, Отанға қорған болған ардагерлердің ерен еңбегі алдында мәңгілік қарыздармыз,- деп, елге бейбітшілік пен тұрақтылық, барлық қатысушыларға денсаулық пен бақыт тіледі.

Одан әрі судьялардың қатарында Ауған соғысына, Чернобыль апатын залалсыздандыруға қатысқан ардагерлерге Құрмет грамоталарын тапсырып, олардың ерлігі мен батырлықтары үшін алғыс білдірді.

 Сонымен бірге қос мереке қарсаңында сот жүйесінің өркендеуі мен сот реформаларының жүзеге асырылуына үлес қосып,  сот төрелігін атқаруда еңбектің жоғарғы сапасын қамтамасыз еткені үшін бірқатар судьяларды сот төрағасының алғыс хаттарымен марапаттады.

 Өз кезегінде ақ тілегін білдірген Соттар әкімшісінің басшысы Хыдыр Бегалиев өз міндеттерін мінсіз атқарып, жұмыста  белсенділік пен аса жоғары жауапкершілік танытқаны үшін сот қызметкерлеріне Алғыс хаттар тапсырды.

Мерекелік іс-шара соңы М.Өскінбаев атындағы облыстық филармония өнерпаздарының концерттік бағдарламасына жалғасты.

Суреттерді түсірген Маңғыстау облыстық сотының баспасөз қызметі