«Жас батыр»балуандары жарыс жеңімпазы атанды

      10-12 тамыз аралығында облыс орталығында самбодан ҚР-ның еңбегі сіңген жаттықтырушысы, Құрмет орденінің иегері Мерейғалы Көшкіновтың жүлдесіне арналған ашық Республикалық турнир өтті.  Жарысқа еліміздің барлық аймағынан және Тәжікстан, Өзбекстан мемлекеттерінен 300-ге жуық 1997-1998 жылы туған балуандар қатысты.

            Дүбірлі доданың салтанатты ашылуына Маңғыстау облыстық маслихатының хатшысы  Бекмұрат Жүсіпов, облыстық спорт басқармасының басшысы Бекболат Байжанов, Ақтау қаласы әкімінің орынбасары Тілек Көшмағанбетов, облыстық «Жас батыр» мамандандырылған балалар мен жасөспірімдер спорт мектебінің басшысы Манарбек Бисекенов қатысып, жарыс қатысушыларына сәттілік тіледі.

             -Бұл бәсеке Қазақстан Республикасы самбо федерациясының бекітілген күнтізбелік жоспары бойынша Әлем чемпионатының алдындағы іріктеу жарысы болып есептеледі. Айтулы жарыста облыс намысын 30 ұл мен 6 қыз қорғайды. Олардың қатарында аймақтың атынан халықаралық жарыстарға қатысып, жүлделі орындарды иеленіп жүрген балуандарымыз да бар.

Жалпы, турнирді ұйымдастырудағы басты мақсат-самбошылардың шеберлігін шыңдау, жастар арасында салауатты өмір салтын насихаттау, татулықты нығайту. Бұл жолы төрт салмақ дәрежесі бойынша алтын медаль аламыз деп жоспарлап қойдық. Балдарымыз жақсы күресіп жатыр. Биыл кіші жасөспірімдер арасында өткен жарыста ҚР чемпионы атанған балуанымыз Дәурен Төлегенов қазір финалдық белдесуге жолдама алды,-дейді экстра-класс дәрежесіндегі төреші, облыстың самбодан аға бапкері Берік Жұмағалиев.

            Жарыстың салтанатты ашылуынан кейін «Халықаралық достық» медалімен самбо күресінен Азия федерациясының төрешілер алқасының төрағасы Махмуди Абдуллаев,  «Қазақстан Республикасында спортты дамытуға қосқан үлесі үшін» медалімен жарыстың бас төрешісі Болат Қожахметов,  «Маңғыстау облысында спортты дамытуға қосқан үлесі үшін» медалімен кәсіби сынықшы Айнұр Асқарқызы, Аллаберген Қонарбаев марапатталды. Сондай-ақ «Елімізде самбо күресінің дамуына үлес қосқаны үшін» ордені бірнеше халықаралық жарыстардың жеңімпадары Нұркен Домбаев, Сұңғат Жұбатқан,  Рамазан Мамаев,  Бауыржан Сағынғалиұлына табысталды.

            -Бүгінгі жарысқа Тәжікстаннан екі спортшыны алып келдім. Қос спортшымыз самбодан Азия чемпионатының күміс және Әлем чемпионатның қола жүлдегерлері. Әрине, жүлделі орындардан үміттіміз. Жалпы Ақтау қаласына өзім алғаш рет келіп тұрмын. Жарыс өте жоғары деңгейде ұйымдастырылған деп айта аламын. Соңғы кездері маңғыстаулық балуандар халықаралық жарыстарда жақсы өнер көрсетіп, жетістіктерге жетіп жүр. Жақында Ташкентте спорттық және жауынгерлік самбодан өткен Азия чемпионатында жерлестеріңіз жақсы нәтижие көрсетті. Сіздерде самбо күресі қарқынды дамып келе жатыр деп айтуға толық негіз бар,-дейді Тәжікстаннан келген қонақ, самбо күресінен Азия федерациясының төрешілер алқасының төрағасы Махмуди Абдуллаев.  

            Самбо күресінен ұйымдастырылған жарыс 24 шағынаудандағы облыстық «Жас батыр» мамандандырылған балалар мен жасөспірімдер спорт мектебінде өтті. Екі күнге созылған турнирдің қорытындысында командалық есепте 11 алтын, 15 күміс және 10 қола медальдармен бірінші орыннан ақтаулық «Жас батыр» спорт мектебі көрінді.

            -Бүгінгі жарыста топ жарып, турнир чемпионы атанғаныма өте қуаныштымын. 56 келі салмақта батысқазақстандық, атыраулық, маңғыстаулық балуандардан басым түсіп, жүлделі бірінші орынды иелендім.

 Бұл жарыста сіңілім Эльмира да сәтті өнер көрсетіп, 60 келі салмақта чемпион атанды. Осылайша отбасымызға қос алтын сыйладық,-дейді «Жас батыр» спорт мектебінің шәкірті Зина Хасан.

            Екінші орынға 3 алтын және 1 күміс медальдармен Шығыс Қазақстан облысының балуандары тұрақтады.

Жүлделі үшінші орын - 9 қола медальды иеленген Маңғыстау ауданының балуандарына бұйырды.

Суреттерді түсірген Талант ҚҰСАЙЫН.