Соттар әкімшісі бос орындар жәрмеңкесіне қатысты

Ақтау қаласында облыстық бос орындар жәрмеңкесі өткізілді. Еңбек нарығында сұраныс пен ұсыныстың сай келуін қамтамасыз етіп, жұмыссыз жастарды жұмысқа орналастыру, мемлекеттік қызметке тартып, қызығушылығын ояту мақсатында өткізілген іс-шараға «екі қолға бір күрек» таппай жүрген жұмыссыз азаматтар мен басқа жұмысқа орналасуға ниет білдірушілер қатысты.

Облыстық жәрмеңкеге Маңғыстау облысы бойынша Соттар әкімшісінің персоналды басқару бөлімінің басшысы Қ.Нұрғабылұлы мен осы бөлім қызметкерлері де қатысып, өңір соттарындағы бос орындар туралы ақпарат берді. Сондай-ақ, кадр қызметкерлері қатысушыларға мемлекеттік қызметке кірудің жалпы тәртібін түсіндіріп, түрлі сауалдарына жауап берді. Жәрмеңкеде сот саласында қызмет атқаруға ниет білдіргендер саны аз болған жоқ. Соның ішінде мемлекеттік және штаттан тыс қызметкерлерге қойылатын талаптарға сәйкес келетін 10 азаматтың түйіндемелері назарға алынды. Алдағы уақытта олар жалпы конкурсқа қатысып, өз білімдерін көрсетіп, шекті балл жинай алған жағдайда, сот жүйесі тағы да жас мамандармен толықтырылатын болады.

Бүгінгі күні облыс бойынша соттарда қызметкерлердің штаттық саны 301 болса, соның ішінде 10 бос жұмыс орны бар.

«Бос орындар жәрмеңкесі» жұмыссыз азаматтарға өзіне ыңғайлы жұмыс табуға, жұмыс берушіге жұмыс орнын жабдықтауға мүмкіндік берді. Бұл туралы Маңғыстау облысы бойынша Соттар әкімшісінің персоналды басқару бөлімінің бас маманы Гүлзат Жидебаева хабарлады.