Сайын шапағатов ауылында балабақша ашылды

Түпқараған ауданы Сайын Шапағатов ауылында жекеменшік балабақша ашылды. 75 орындық кешен заман талабына сай салынған. Жергілікті кәсіпкер қолға алған жоба мемлекет қолдауымен жүзеге асты. Ауылдықтар мұнда бала басына 11 мың теңгеден төлейді. Қалған шығын мемлекеттік «Балапан» бағдарламасы аясында өтеледі.

             Бес баланың анасы Айгүл Ғұсманова - жоғары санатты мұғалім. Өзі тұратын ауылда бала санының көптігіне орай екі қабатты үйін бөбекжайға айналдыруды ойлайды. Мұратына жету үшін 12 млн теңгедей несие рәсімдеп, кәсіп ашады.

Айгүл Ғұсманова, кәсіпкер:

- Халық көп. Жылдан жылға көбейіп жатыр. Сондықтан балабақша ашуды өзіме міндет көрдім. Жұмыс өте қызық, бәрімізге ұнап жатыр.

Бөбекжай тәрбиешілері аудандық жұмыспен қамту орталығынан жолдама алған жастардан тұрады. Бұрын қалаға қатынап қызмет атқарған мамандар тұрғылықты жерде тұрақты жұмыс көзінің ашылғанына қуанышты.

Гүлжан Ізғалиева, тәрбиеші:

- Білімді, саналы бала тәрбиелеуге үлесімді қосамын. Өзім салада әдіскер қызметін атқарамын. Алғашқы уақытта білікті маман болуға ниеттемін.

            Балабақшада сурет салу, музыка және дене шынықтыру сыныптары бар. Үш тілде білім беру үрдісі қалыпты жолға қойылған. Мамандар келешек бөбекжай жанынан бақша егуді жоспарлауда. Жасыл желек күтіміне сәбилер де үлес қоспақ.