Маңғыстауда мемлекеттік тапсырысты 26 жеке меншік клиника орындап жатыр

Аймақтағы ірі жеке меншік клиникалар биыл да Әлеуметтік медициналық сақтандыру қорымен (МСҚ) ынтымақтасып жұмыс істеп жатыр. Қазіргі таңда МСҚ жергілікті филиалы 2019 жылы 26 жеке меншік клиникамен келісімшарт бекіткен. Бұл туралы брифингте МСҚ облыстық филиалы директоры Бақыт Исмаханбетов мәлімдеді.

- Келісімшарт бекіткен емдеу мекемелері арасында «SofieMedGroup», «Чакур», «Нейрон», «Медикер», «Жалымбетов» сынды ірі клиникалар бар. Биыл тек жеке меншік клиникалардың өзіне кепілдендірілген тегін медициналық көмек пакеті шеңберінде 2,791 млрд теңге бөлініп отыр, - деді Бақыт Торғайбайұлы.

Айтуынша, биыл мемлекеттік тапсырыс бойынша жеке меншік клиникалар көрсететін медициналық көмек түрлері де көбейді. Олар кепілдендірілген медициналық көмек пакетіне енген қызметтерді ғана тіркелген тұрғындарға тегін көрсетеді. Алайда, бұл жеке меншік клиника халыққа толығымен тегін қызмет көрсетеді деген сөз емес. Жеке меншік клиникалар ақылы қызмет беруін тоқтатпайды.

Суреттерді түсірген МСҚ облыстық филиалының баспасөз қызметі