Студенттер театрландырылған қойылымдар сайысын өткізді

Ақтаулық студенттер «Болашаққа жол» атты театрландырылған қойылымдар сайысын өткізді.

Ең үздік шағын спектакль байқауына 7 команда қатысты. Өнер жарысында жастарға 10 минут ішінде тәуелсіз еліміздің тарихы ғана емес, ширек ғасырда жеткен жетістіктерін де толық баяндау міндеттелді. Азат елдің арманшыл ұрпағы сахна төрінде қазақ елінің биік белестерді бағындырған сәттерін айшықтап берді. Туған елінің тарихына айрықша мән берген жастар жасампаздықты жырлады.

Сайысқа үлкен дайындықпен келген олардың сөздері мазмұнды, көріністері тартымды болды. Туындыларында нағыз режиссерлік шешім бар. Жастардың еңбегін қазылар алқасы әділ бағалады. «Ең үздік қойылым», «Актерлік шеберлік», «Режиссерлік шешім», «Ең үздік безендіру» бойынша үздіктер анықталды.

Байқау қорытындысы бойынша, «Мәңгілік ел» қойылымын көрсеткен Ақтау көлік колледжінің студенттері бас бәйгені жеңіп алды.