Ақтаудағы 4-шағынауданға абаттандыру жұмыстары жүргізіледі

Ақтау қаласындағы 4-шағынауданға абаттандыру жұмыстарын жүргізу жоспарланып отыр. Бұл туралы облыс әкімдігінің телеграм каналында тұрғынның жолдаған сауалына жауап берген Ақтау қалалық құрылыс бөлімінің өкілдері мәлімдеді.

Желі қолданушысы өзі тұратын ықшам ауданда балалар ойын алаңы, тротуардың жоқтығы мен көлік тұрағы мәселесі өзекті болып тұрғанын тілге тиек етіп, тиісті мекемеден аталған мәселенің шешілуін сұраған. Тұрғынның сауалына Ақтау қалалық құрылыс бөлімінің өкілдері дер кезінде жауап берді, - деп хабарлайды Қоғамдық коммуникация орталығы.

Жауапты мекеме өкілдерінің мәлімдеуінше, 1, 4, 14, 22, 28А, 29 шағынауданды абаттандырудың бас жоспары жасақталған. Аталған құжатта балалар ойын алаңы, тротуар мен көлік тұрағының орындары анықталған. Бас жоспардың өзге тараулары бойынша жобалық-сметалық құжаттама сараптамаға осы жылдың қыркүйек айында жолданады екен.

-Шағынаудандарды абаттандыру жұмыстары тозығы жеткен су және жылу жүйесінің құбырлары мен кәріз желісінің ауыстырылуынан соң ғана жүргізіледі - дейді Ақтау қалалық құрылыс бөлімінің өкілдері.